බිංගිරිය ප්‍රධාන ආර්ථික මධ්‍යස්ථානයක් බවට පත්කිරීමේ අරමුණින් බිංගිරිය අපනයන සැකසුම් කලාපයේ දෙවැනි සහ තෙවැනි අදියර ජනාධිපති රනිල් වික්‍රමසිංහ මහතා අතින් විවෘත කෙරිණි.
මෙම ව්‍යාප්තිය තුළින් ඇස්තමේන්තුගත ඩොලර් මිලියන 2,600 ක අපනයන ආදායමක් උපයා ගැනීමටත් රැකියා අවස්ථා 75,000 ක් උත්පාදනය කිරීමටත් සැලසුම් කර ඇති බව ජනාධිපති මාධ්‍ය අංශය පවසයි.
අපනයන ආර්ථිකය, නිෂ්පාදන, සංචාරක, තාක්ෂණ ක්ෂේත්‍ර සහ නවීන කෘෂිකර්මාන්තය නංවාලීමට රජයේ කැපවීම ජනාධිපතිතුමා අවධාරණය කළේය.
2018 වසරේ ආරම්භ කරන ලද බිංගිරිය ආයෝජන කලාපය මෙම දැක්මේ මුල් ගලක් බව ඔහු අවධාරණය කළේය. ව්‍යාප්තියේ කොටසක් ලෙස අලුතින් ආරම්භ කරන ලද Dongxia Industrial & Commerce Co. Ltd. දැනට පුද්ගලයින් 400ක් පමණ සේවයේ යොදවමින් රැකියා උත්පාදනය සහ ආර්ථික වර්ධනය සඳහා කලාපයේ ඇති හැකියාව අවධාරනය කරයි.
බිංගිරිය, දුම්මලසූරිය සහ මාදම්පේ නගර ප්‍රමිතීන්ට නංවාලීමේ සැලසුම් පිළිබඳව ජනාධිපති වික්‍රමසිංහ මහතා සමාරම්භක අවස්ථාවේදී සාකච්ඡා කළේය.
මේ සමස්ත ආයෝජන කලාපයම සංවර්ධනය කිරීම හරහා රැකියා අවස්ථා 75,000ක් නිර්මාණය කරන්න පුළුවන්. මීට අමතරව ඉරණවිල, බිංගිරිය සහ හලාවත සංචාරක ප්‍රදේශ ලෙස සංවර්ධනය කිරීමට නියමිත අතර ඉරණවිල ප්‍රදේශයේ ගොල්ෆ් පිටියක් ඉදිකිරීමට සැලසුම් කර ඇත. තොරතුරු තාක්ෂණ කලාපයක් නිර්මාණය කිරීම සහ හලාවත වැවිලි සමාගමේ වතුයාය කෘෂිකාර්මික නවීකරණ වැඩපිළිවෙලක් සඳහා යොදා ගැනීම කෙරෙහි ද අවධානය යොමු කර තිබෙනවා
යැයි ජනාධිපති වික්‍රමසිංහ මහතා පැවසීය.
