මහ මැතිවරණයට පසුදා පොහොය දිනයක් වුවද පන්සල් ඡන්ද මධ්‍යස්ථාන ලෙස භාවිත කිරීමට විහාරස්ථානාධිපතිවරුන් බහුතරයක් අකමැත්ත පළ කර නොමැති බව මැතිවරණ කොමිසම පවසයි.
ඒ අනුව මෙවර මහ මැතිවරණයේදී විහාරස්ථාන 2263ක් ඡන්ද මධ්‍යස්ථාන ලෙස භාවිත කිරීමට නියමිතයි.
කඨින පූජෝත්සවය පැවැත්වීම හේතුවෙන් යම් යම් බාධා එල්ල විය හැකි බවට විවිධ පාර්ශ්ව විසින් ප්‍රකාශ කළ ද මැතිවරණ කොමිෂන් සභාව මේ සම්බන්ධයෙන් දිස්ත්‍රික් මැතිවරණ නිලධාරීන් හරහා විහාරස්ථාන වෙත විමසීමක් කර ඇති බව මැතිවරණ කොමිසම ප්‍රකාශ කළා.
මේ අතර දිස්ත්‍රික් මැතිවරණ නිලධාරීන් සහ සහකාර මැතිවරණ කොමසාරිස්වරුන් හෙට (06) මැතිවරණ කොමිෂන් සභාව වෙත කැඳවා තිබේ.
පාර්ලිමේන්තු මැතිවරණයේ ඉදිරි කටයුතු සම්බන්ධයෙන් සාකච්ඡා කිරීම සඳහා අදාළ රැස්වීම පැවැත්වීමට නියමිතයි.
පාර්ලිමේන්තු මැතිවරණයට අදාළ තැපැල් ඡන්ද සලකුණු කිරීමේ කටයුතු ඊයේ (04) සිදු කෙරුණු අතර තැපැල් ඡන්ද සලකුණු කිරීමට නොහැකි වූ ඡන්ද දායකයින් සඳහා මේ මස 07 සහ 08 යන දෙදින තුළ අවස්ථාව සලසා දී ඇත.
මේ අතර නිල මැතිවරණ දැන්වීම් බෙදා හැරීමේ කටයුතු සියයට 75කට වැඩි ප්‍රමාණයක් අවසන් කර ඇති බව තැපැල් දෙපාර්තමේන්තුව පවසයි.
