මහ මැතිවරණය සඳහා ඉදිරිපත් වන අපේක්ෂකයින් සිය වියදම් සහ ආදායම් වාර්තා පවත්වාගෙන යාම සඳහා වෙනමම පුද්ගලයෙකු පත් කරගැනීමට කටයුතු කිරීම සුදුසු බව පැෆ්රල් සංවිධානය පෙන්වා දෙයි.
එහි විධායක අධ්‍යක්ෂ රෝහණ හෙට්ටිආරච්චි මහතා පැවසුවේ එසේ නොවන්නේ නම් පසුගිය ජනාධිපතිවරණයේ ආදායම් වියදම් වාර්තා ලබාදීමේදී ඇතැම් අපේක්ෂකයින්ට සිදුවූ දුෂ්කරතාවලට මෙම අපේක්ෂකයින්ටද මුහුණදීමට සිදුවිය හැකි බවයි.
මේ අතර මැතිවරණයේදී නිසි ආදායම් වියදම් වාර්තා ලබා නොදෙන අපේක්ෂකයින් මුහුණ දෙන තත්ත්වයන් පිළිබඳව ප්‍රජාතන්ත්‍රවාදය, ප්‍රතිසංස්කරණ හා මැතිවරණ අධ්‍යයනය පිළිබඳ ආයතනයේ විධායක අධ්‍යක්ෂ මංජුල ගජනායක මහතා අදහස් පළ කළේය.
“යම් ආකාරයකින් අපේක්ෂකයෙකුට තමන්ගේ වියදම් වාර්තා ලබාදීමට නොහැකි වුවහොත්, නැතිනම් අසත්‍ය තොරතුරු ඇතුළත් කළොත් අධිකරණ ක්‍රියාවලියක් තුළින් දේශපාලන අයිතිය වසර 3කට අහිමි විය හැකියි. මැතිවරණ පෙත්සමක් තුළින් ධුරය අහිමිවීමට හැකියි.”
