2015 වසරේ පැවති ජනාධිපතිවරණය සමයේ සතොස ආයතනය මන් කැරම් බෝඩ් සහ දාම් ලෑලි 14,000ක් බැගින් ආනයනය කොට ක්‍රීඩා සංගම් අතර බෙදාදීම තුළින් රජයට රුපියල් මිලියන 5කට අධික පාඩුවක් සිදුකළේ යැයි චෝදනා කරමින් හිටපු ක්‍රීඩා අමාත්‍ය මහින්දානන්ද අලුත්ගමගේ සහ සතොස ආයතනයේ හිටපු සභාපති සහ හිටපු වෙළෙඳ අමාත්‍ය නලින් ප්‍රනාන්දු යන මහත්වරුන්ට එරෙහිව අල්ලස් කොමිසම විසින් ගොනුකර තිබෙන නඩුව අද (19) කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේ යළි කැඳවනු ලැබීය.
මෙම නඩුව ප්‍රදීප් හෙට්ටිආරච්චි, ප්‍රදීප් අබේරත්න සහ මහේන් වීරමන් යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල ඉදිරියේ කැඳවීම සිදුවුණි.
ඒ අනුව නඩුවට අදාළ ලිඛිත හා වාචික දේශන ජනවාරි මස 22 වනදා ඉදිරිපත් කරන ලෙස විනිසුරු මඩුල්ල දෙපාර්ශවයේ නීතිඥවරුන්ට නියෝග කළේය.
මෙහිදී විත්තිකාර නලින් ප්‍රනාන්දු මහතා වෙනුවෙන් පෙනී සිටියේ නීතිඥවරු කළ ඉල්ලීමක් පිළිගත් විනිසුරු මඩුල්ල විත්තිකාර නලින් ප්‍රනාන්දු මහතාට ජනවාරි මස 10 වනදා සිට 16 වනදා දක්වා විදේශගත වීමට අවසර ලබා දුන්නේය.
එම නියෝගය ආගමන හා විගමන පාලකවරයා වෙත දැනුම්දෙන ලෙසත් නියෝගයේ සඳහන් වුණි.
