2024 වසරේ දෙසැම්බර් 14 දක්වා කාලසීමාව තුළ අධිවේගී මාර්ගවල සිදුවූ මාරක රිය අනතුරු 12කින් පුද්ගලයින් 16දෙනෙකු ජීවිතක්ෂයට පත්ව තිබේ.
පොලීසිය පැවසුවේ, පුද්ගලයින් 05 දෙනෙකු බරපතළ තුවාල ලබා ඇති අතර තවත් පුද්ගලයින් 77 දෙනෙකු සුළු තුවාල ලබා ඇති බවය.
එමෙන්ම මෙම රිය අනතුරුවලින් දේපල හානි 404ක් වාර්තා වී තිබේ.
මෙම අනතුරුවලින් බොහොමයක් සිදුව ඇත්තේ වේගය පාලනය කර ගත නොහැකිව බව පොලීසිය පවසයි.
මේ ඒ සම්බන්ධයෙන් වැඩිදුරටත් කරුණු පැහැදිලි කරන පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි කේ.බී.මනතුංග මහතා,
“ශ්‍රී ලංකාවේ දැනට පවතින අධිවේගී මාර්ගයේවල මේ දක්වා සිදුවූ රිය අනතුරුවලින් පුද්ගල ජීවිත හානී 16ක් වගේම, බරපතළ තුවාල සිදුවීම් 05ක් වාර්තා වෙනවා. මෙම අනතුරුවලට පදනම් වූ කරුණු මොනවද කියලා විමර්ශනවලදී අනාවරණය වී තිබෙනවා. එතනදි ප්‍රධාන කරුණු දෙකක් තමයි මේකට හේතු වෙන්නේ එකක් තමයි අපරික්ෂාකරී සහ නොසැලකිලිමත් රිය ධාවනය, දෙවන කාරණය තමයි රියදුරාට තියෙන අධික තෙහෙට්ටුව. ඒ නිසා ශ්‍රී ලංකා පොලීසිය විදිහට අපි ඔබගෙන් ඉල්ලා සිටින්නේ අධිවේගි මාර්ගයේ රිය ධාවනය කරන කොට මාර්ග නීතිඋල්ලංඝනය කරමින් රිය ධාවනය කරන්න එපා. මොකද අධිවේගී මාර්ගයේදී ඔබ ගමන්ගන්නා වේගය සාමාන්‍ය මාර්ගයේ ගමන්ගන්නා වේගයට වඩා ඉහළයි. එම නිසා ඒ අවස්ථාවේදී අනතුරක් සිදුවුණත් බොහෝවිට ඔබගේ ජීවිතයට හානියක් වෙන්න පුළුවන්. ඒ වගේම තමයි ඔයාලා රිය ධාවනය කරනකොට තෙහෙට්ටුවෙන් නම් කිසිම වෙලාවක රිය ධාවනය කරන්න එපා.”
