නිවාස බිඳ දේපළ සොරකම් කිරීමට අවශ්‍යව සිටි සැකකරුවෙකු අයිස් මත්ද්‍රව්‍ය සමඟ ගල්කිස්ස කොට්ඨාශ අපරාධ විමර්ශන කාර්යාංශය විසින් ඊයේ (21) අත්අඩංගුවට ගෙන තිබෙනවා.
ගල්කිස්ස බඩෝවිට පාලම අසල අපරාධ නිවාරණ රාජකාරියේ යෙදී සිටි ගල්කිස්ස කොට්ඨාශ අපරාධ විමර්ශන කාර්යාංශයේ නිලධාරීන් කණ්ඩායමක් විසින් සිදුකළ වැටලීමකදී මෙම අත්අඩංගුවට ගැනීම සිදු කර ඇත.
සැකකරු බඩෝවිට ප්‍රදේශයේ පදිංචි 29 හැවිරිදි අයෙකු වන අතර, ඔහු අත්අඩංගුවට ගන්නා විට අයිස් මත්ද්‍රව්‍ය ග්‍රෑම් 12 යි මිලිග්‍රෑම් 150 ක් සන්තකයේ තිබී ඇති බව පොලිසිය පවසයි.
මෙම පුද්ගලයාද නොවැම්බර් 10 වැනිදා දෙහිවල පොලිස් වසමේ නිවසක් බිඳ විදුලි උපකරණ ඇතුළු ගෘහභාණ්ඩවලට අලාභහානි කර රුපියල් ලක්ෂ 12කට අධික වටිනාකමකින් යුත් රන් භාණ්ඩ සහ ජංගම දුරකථන 04ක් සොරකම් කිරීමට අවශ්‍යව සිටි සැකකරුවෙකි.
සැකකරු ඉහත අපරාධ සඳහා භාවිත කළ කඩුවක් ද පොලිසිය විසින් සොයාගෙන තිබේ.
