නීතිවිරෝධී ලෙස එකලස් කළ මෝටර් රථයක් භාවිත කිරීමේ සිද්ධියක් සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටින හිටපු රාජ්‍ය අමාත්‍ය ලොහාන් රත්වත්තේ සහ ඔහුගේ බිරිඳගේ ඇප ඉල්ලීම නුගේගොඩ මහේස්ත්‍රාත් අධිකරණය යළිත් වරක් ප්‍රතික්ෂේප කළා.
ඒ අනුව හිටපු රාජ්‍ය අමාත්‍යවරයා දෙසැම්බර් මස 02 වැනිදා දක්වාත් ඔහුගේ බිරිඳ නොවැම්බර් 22 වැනිදා දක්වාත් තවදුරටත් රක්ෂිත බන්ධනාගාර ගත කිරීමට නියෝග කෙරුණා.
පසුගියදා හිටපු රාජ්‍ය අමාත්‍ය ලොහාන් රත්වත්තේ මහතාගේ බිරිඳ වන ශෂී ප්‍රභා රත්වත්තේ මහත්මියට අයත් මිරිහාන අම්මුදෙණිය සාලාව පාරේ තෙමහල් නිවසක නවතා තිබී අංක තහඩු නොමැති සුඛෝපභෝගී මෝටර් රථයක් සොයා ගැනුණා.
ඒ අනුව අදාළ මෝටර් රථය සම්බන්ධයෙන් මිරිහාන පොලිසිය සිදුකළ පරීක්ෂණවලදී එය නීති විරෝධී ලෙස එකලස් කරන ලද මෝටර් රථයක් බවට අනාවරණ වුණා.
එම මෝටර් රථය භාවිත කිරීමේ චෝදනාව මත ඔක්තෝබර් 30 වැනිදා ලොහාන් රත්වත්තේ මහතා මිරිහාන පොලිසිය මගින් කටුගස්තොටදී අත්අඩංගුවට ගෙන අධිකරණයට ඉදිරිපත් කිරීමෙන් පසු නොවැම්බර් 7 වැනිදා දක්වා රක්ෂිත බන්ධනාගාරගත කෙරිණි.
එවන් පසුබිමක රත්වත්තේ මහතාගේ බිරියවන ශෂි ප්‍රභා රත්වත්තේ මහත්මියද නොවැම්බර් 4 වනදා අත්අඩංගුවට ගත් අතර, අදාළ මෝටර් රථය සම්බන්ධයෙන් ඇය දැනුවත් භාවයකින් පසු වී ඇතැයි විමර්ශනවල ප්‍රගතිය ගැන කරුණු දක්වමින් මිරිහාන පොලිසිය අධිකරණය හමුවේ ප්‍රකාශ කිරීමෙන් පසු කරුණු සලකා බැලූ අධිකරණය සැකකාර රත්වත්තේ මහත්මිය නොවැම්බර් 07 වනදා දක්වා රක්ෂිත බන්ධනාගාර ගත කිරීමට නියෝග කළේය.
අනතුරුව නොවැම්බර් 7 වැනිදා සැකකරුවන් නුගේගොඩ මහේස්ත්‍රාත්වරයා හමුවට ඉදිරිපත් කළ අවස්ථාවේදී සැකකරුවන්ගේ ඇප ඉල්ලීම ප්‍රතික්ෂේප කළ මහේස්ත්‍රාත්වරයා සැකකරුවන් අද දක්වා රක්ෂිත බන්ධනාගාර ගත කරන ලෙස නියෝග කළා.
ඒ අනුව සැකකරුවන් අද පෙරවරුවේ නුගේගොඩ අධිකරණයට ඉදිරිපත් කෙරුණා.
සැකකරුවන් වෙනුවෙන් මහේස්ත්‍රාත්වරයා හමුවේ පෙනී සිටි නීතිඥවරුන් කියා සිටියේ තම සේවාදායකයන්ට එරෙහිව ගොනු කර ඇත්තේ මෝටර් රථ පනත යටතේ වැරදි පමණක් බැවින් එම චෝදනා ඇප දිය හැකි බැවින් ඕනෑම ඇප කොන්දේසියක් යටතේ ඔවුන් මුදා හැරිය යුතු බවයි.
කෙසේ වෙතත් සැකකරුවන්ගේ ඇප ඉල්ලීම ප්‍රතික්ෂේප කළ නුගේගොඩ මහේස්ත්‍රාත්වරයා සැකකාර හිටපු රාජ්‍ය අමාත්‍ය ලොහාන් රත්වත්තේ මහතා දෙසැම්බර් 02 වැනිදා දක්වාත්, සැකකාර ශෂී ප්‍රභා රත්වත්තේ මහතා නොවැම්බර් 22 වැනිදා දක්වාත් රක්ෂිත බන්ධනාගාරගත කිරීමට නියෝග කළේය.
