හිටපු ආරක්ෂක ලේකම් හේමසිරි ප්‍රනාන්දු සහ හිටපු පොලිස්පති පූජිත් ජයසුන්දර යන මහත්වරු එම චෝදනාවලින් නිදොස් කොට නිදහස් කිරීමට කොළඹ ත්‍රිපුද්ගල මහාධිකරණ විනිසුරු මඩුල්ලක් විසින් දුන් නියෝගයට එරෙහිව නීතිපතිවරයා විසින් ඉදිරිපත් කළ අභියාචනයක් විභාග කළ ශ්‍රේෂ්ඨාධිකරණය එම නඩුවට අදාළ විත්ති වාචකය කැඳවීමට පියවර ගන්නා ලෙස ත්‍රිපුද්ගල මහාධිකරණ විනිසුරුමඩුල්ල නියම කළේය.
පාස්කු ඉරිදා ත්‍රස්ත ප්‍රහාරයක් සම්බන්ධයෙන් නිශ්චිත බුද්ධි තොරතුරු ලැබී තිබියදී එය වැළැක්වීමට කටයුතු නොකිරීමෙන් සාපරාධී රාජකාරි පැහැර හැරීම් සහ මිනීමැරීම සම්බන්ධයෙන් ඔවුන්ට චෝදනා එල්ල විය.
නීතිපතිවරයා ඉදිරිපත් කළ අභියාචනා දීර්ඝ ලෙස විභාගයට ගැනීමෙන් අනතුරුව ප්‍රීති පද්මන් සූරසේන මහතා ප්‍රමුඛ පංච පුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම තීරණයට එළඹ ඇත.
හිටපු ආරක්ෂක ලේකම් හේමසිරි ප්‍රනාන්දුට සහ හිටපු පොලිස්පති පූජිත් ජයසුන්දරට එරෙහිව නීතිපතිවරයා විසින් කොළඹ මහාධිකරණයේ ත්‍රිපුද්ගල විනිසුරු මඩුල්ලක් හමුවේ නඩු පවරා තිබුණා.
එම නඩු විභාග කළ ත්‍රිපුද්ගල මහාධිකරණ විනිසුරු මඩුල්ල විත්ති පාර්ශ්වයේ සාක්ෂි කැඳවීමකින් තොරව විත්තිකරුවන් දෙදෙනාම නිදොස් කොට නිදහස් කිරීමට තීරණය කර ඇත.
ත්‍රිපුද්ගල මහාධිකරණ විනිසුරු මඩුල්ලේ තීන්දුව නීතියට පටහැනි බවත් එය බල රහිත කරන ලෙසත් ඉල්ලා නීතිපතිවරයා විසින් මෙම අභියාචනා පෙත්සම් ශ්‍රේෂ්ඨාධිකරණය වෙත ඉදිරිපත් කර තිබුණි.
නඩු විභාගයෙන් අනතුරුව තීන්දුව ප්‍රකාශයට පත් කරමින් ශ්‍රේෂ්ඨාධිකරණ විනිසුරු මඩුල්ල ප්‍රකාශ කළේ විභාගය පැවැත්වෙන අවස්ථාවේදී මහාධිකරණය විසින් විත්තිකරු කැඳවිය යුතුව තිබූ බවයි.
ඒ අනුව මෙම තීන්දු ප්‍රකාශයට පත් කරන බවයි විනිසුරුවරයා සඳහන් කළේ.
