හිටපු පාර්ලිමේන්තු මන්ත්‍රී උදය ගම්මන්පිලගේ දෙවන පාස්කු හෙළිදරව්ව හරහා රවී සෙනෙවිරත්න මහතා සහ ශානි අබේසේකර මහතා ඉලක්ක කර ඇති බව පැහැදිලි බව කැබිනට් මාධ්‍ය ප්‍රකාශක, අමාත්‍ය විජිත හේරත් මහතා පවසයි.
අමාත්‍යවරයා මේ බව පැවසුවේ අද (29) පැවති කැබිනට් තීරණ දැනුම් දීමේ මාධ්‍ය හමුවේදී මාධ්‍යවේදියෙකු ඇසූ ප්‍රශ්නයකට පිළිතුරු දෙමිනි.
එහිදී වැඩිදුරටත් අදහස් දැක්වූ අමාත්‍ය විජිත හේරත් කියා සිටියේ චැනල් ෆෝ නාලිකාවේ සිද්ධිය සම්බන්ධයෙන් පළ වූ වාර්තාව වැරදි බවට හිටපු ආරක්ෂක ලේකම්වරයා නිවේදනයක් නිකුත් කිරීම දේශපාලන කාරණයක් බවයි.
පරීක්ෂණයක් නොපවත්වා මෙවැනි දෙයක් ප්‍රකාශ කළේ කිසියම් පිරිසක් බේරා ගැනීමට බවත් වත්මන් රජය එවැනි ක්‍රියාවක් කිසිවිටකත් සිදු නොකරන බවත් අමාත්‍යවරයා පැවසීය.
