සිවිල් වැසියන්ට ලබාදුන් ගිනි අවි සහ පතොරම් තාවකාලිකව භාරදෙන ලෙස රජයට කළ දැනුම්දීම අනුව ගිනි අවි 50කට අධික ප්‍රමාණයක් ආපසු භාරදී ඇති බව ආරක්ෂක අමාත්‍යාංශයේ ආරංචි මාර්ග පවසයි.
ඒ අනුව අදාළ ගිනි අවි සහ පතොරම් නොවැම්බර් 7 වැනිදාට පෙර වැලිසර පිහිටි රජයේ වාණිජ පුපුරණ ද්‍රව්‍ය ගබඩාවට භාර දෙන ලෙස ආරක්ෂක අමාත්‍යාංශය සියලුම බලපත්‍රලාභීන්ට දැනුම් දී තිබිණි.
ආරක්ෂක අමාත්‍යාංශය මගින් ජීවිත ආරක්‍ෂාව සඳහා ලබාදී ඇති සියලුම ගිනි අවි පිළිබඳ සමාලෝචනයකට යටත්ව තාවකාලික පදනමක් මත මෙම තීරණය ගෙන ඇත.
මේ තත්ත්වය තුළ ගිනි අවි 50කට ආසන්න ප්‍රමාණයක් ආපසු භාරදී ඇති බවද වාර්තා වේ.
කෙසේ වෙතත් විවිධ හේතූන් මත ආරක්ෂක අමාත්‍යාංශය ගිනි අවි බලපත්‍ර 1650ක් පමණ නිකුත් කර ඇති බව සඳහන්.
මෙම තත්ත්වය තුළ සියලු ගිනි අවි සහ පතොරම් අදාළ දිනයට පෙර භාරදෙන ලෙස ආරක්ෂක අමාත්‍යාංශය ද දැනුම් දී තිබේ.
එසේ නොමැති නම් 1916 අංක 33 දරන තුවක්කු ආඥාපනතට අනුව නීතිමය ක්‍රියාමාර්ග ගැනීමට සිදුවන බව ආරක්ෂක අමාත්‍යාංශය අදාළ බලපත්‍රලාභීන්ට දන්වා ඇත.
ආරක්ෂක අමාත්‍යාංශය වෙත ලබාදී ඇති ගිනි අවි පිළිබඳව සමාලෝචනය කිරීමෙන් අනතුරුව නැවත ඒවා ලබාදීමට බලාපොරොත්තු වන බවයි ආරක්ෂක අමාත්‍යාංශය වැඩිදුරටත් සඳහන් කළේ.
