එළඹෙන මහ මැතිවරණය සඳහා වන්නි දිස්ත්‍රික්කයේ ඉදිරිපත් කළ නාමයෝජනා පත්‍රයක් ප්‍රතික්ෂේප කිරීමට එරෙහිව ශ්‍රේෂ්ඨාධිකරණයට පෙත්සමක් ඉදිරිපත් කර තිබේ.
වන්නි දිස්ත්‍රික්කය සඳහා ප්‍රජාතන්ත්‍රවාදී ජාතික සන්ධානය ඉදිරිපත් කළ නාමයෝජනා පත්‍රය ප්‍රතික්ෂේප කිරීමට දිස්ත්‍රික් තේරීම් භාර නිලධාරිවරයා ගත් තීරණය බලරහිත කරන ලෙස ඉල්ලා මෙම පෙත්සම ශ්‍රේෂ්ඨාධිකරණයට ඉදිරිපත් කර තිබේ.
අදාළ පාර්ශවයේ බලයලත් නිලධාරි පරරාජසිංහම් උදය රාසා සහ තවත් අපේක්ෂකයන් දෙදෙනෙකු විසින් මෙම පෙත්සම ඉදිරිපත් කර ඇත.
වගඋත්තරකරුවන් ලෙස මැතිවරණ කොමිසමේ සභාපතිවරයා සහ එහි සාමාජිකයින් වන වන්නි දිස්ත්‍රික් මැතිවරණ නිලධාරිවරයා ඇතුළු පිරිසක් නම් කර ඇත.
සියලුම ලිපි ලේඛන නිසි පරිදි ඉදිරිපත් කර තිබියදී දිස්ත්‍රික් තේරීම්භාර නිලධාරීවරයා විසින් තම නාමයෝජනා පත්‍රය ප්‍රතික්ෂේප කිරීමට ගෙන ඇති තීරණය නීතියට පටහැනි බවත්, එම තීරණය ඉවතලන රීට් ආඥාවක් බවත් පවසමින් මෙම පෙත්සම ගොනු කර ඇත.
ඊට අමතරව වන්නි දිස්ත්‍රික්කයේ මහ මැතිවරණයේ ඡන්ද විමසීම නොවැම්බර් 14 වැනිදා පැවැත්වීමට අදාළ පෙත්සම විභාග කර අවසන් තීන්දුවක් ප්‍රකාශයට පත් කරන තෙක් අත්හිටුවන ලෙස අතුරු නියෝගයක් නිකුත් කරන ලෙසද පෙත්සමෙන් වැඩිදුරටත් ඉල්ලා තිබේ.
