ශ්‍රී ලංකා පොදුජන පෙරමුණේ ජාතික සංවිධායක හිටපු පාර්ලිමේන්තු මන්ත්‍රී නාමල් රාජපක්ෂ මහතා කුරුණෑගල දිස්ත්‍රික්කයෙන් තරග කරන බවට පළවන වාර්තා ජනතාව නොමඟ යවන අසත්‍ය ප්‍රකාශයක් බව නාමල් රාජපක්ෂගේ මාධ්‍ය අංශය නිවේදනයක් නිකුත් කරමින් පවසනවා.
පසුගිය මහ මැතිවරණයේදී තමන්ව වැඩිම ඡන්ද සංඛ්‍යාවකින් පාර්ලිමේන්තුවට පත්කළ හම්බන්තොට දිස්ත්‍රික්කයේ ජනතාව සිහිපත් කරන නාමල් රාජපක්ෂ, තමාගේ දේශපාලන ආරම්භය ලබාදුන් හම්බන්තොට දිස්ත්‍රික්කයේ ආදරණීය ජනතාව සමඟ තවදුරටත් දේශපාලනයේ නිරත වන බව එම නිවේදනයේ සඳහන් වේ. .
ඉදිරි මහ මැතිවරණයේදී එක් එක් අපේක්ෂකයින් තරඟ කරන දිස්ත්‍රික්ක සහ ඊට අදාළ අවසන් ගිවිසුම් ශ්‍රී ලංකා පොදුජන පෙරමුණ මෙතෙක් තීරණය කර නොමැති බව ද එහි සඳහන් වුණා.
මෙවැනි පසුබිමක හිටපු පාර්ලිමේන්තු මන්ත්‍රී නාමල් රාජපක්ෂ මහතා ඉදිරි මහ මැතිවරණයේදී කුරුණෑගලින් තරග කරන බවට ප්‍රචාරය කිරීම හුදෙක් දේශපාලන වාසි තකා ජනතාව නොමඟ යැවීමක් බවද වැඩිදුරටත් සඳහන් වේ.
