ටී 56 වර්ගයේ ගිනි අවියක් සහ මෙරට නිෂ්පාදිත ගිනි අවි දෙකක් සන්තකයේ තබාගෙන සිටි පුද්ගලයින් තිදෙනෙකු එම ගිනි අවි සමඟ ඊයේ (26) අත්අඩංගුවට ගත් බව පොලීසිය පවසයි.
ටී 56 වර්ගයේ ගිනි අවිය සමග අත්අඩංගුවට ගත් සැකකරු වයස අවුරුදු 51ක් වන කුඹල්ඔලුව ප්‍රදේශයේ පදිංචි විශ්‍රාමික හමුදා සෙබළෙකි.
ඊයේ (26) දහවල් කාලයේ නාඋල, අඹන ඇරිස්ටන් පාර ප්‍රදේශයේ පොලීසිය සිදුකළ වැටලීමකදී මෙරට නිෂ්පාදිත ගිනිඅවියක් සමග සැකකරුවෙකු අත්අඩංගුවට ගැනීමට හැකිවී ඇත. අත්අඩංගුවට ගත් පුද්ගලයා වයස අවුරුදු 55ක් වන කෝන්ගහවෙල ප්‍රදේශයේ පදිංචිකරුවෙකි.
මෙරට නිෂ්පාදිත තවත් ගිනිඅවියක් සමග සැකකරුවෙකු ඇතිමලේ ප්‍රදේශයේදී අත්අඩංගුවට ගෙන ඇත්තේ ඊයේ (26) දහවල් කාලයේ පොලීසිය සිදුකළ වැටලීමකිනි. ඔහු වයස අවුරුදු 39ක් වන ඇතිමලේ වැව ප්‍රදේශයේ පදිංචිකරුවෙකි.
