කළුගඟෙහි කුඩා ගඟ උප ද්‍රෝණියේ ඉහළධාරා ප්‍ර දේශවලට සැලකිය යුතු වර්ෂාපතනයක් ලැබීම හේතුවෙන් කුඩා ගඟ සහ මගුරු ගඟ අවට පහත්බිම් ජලයෙන් යටවීමේ අවදානමක් පවතින බව වාරිමාර්ග දෙපාර්තමේන්තුව පවසනවා.
ඉදිරි පැය 48 තුළ මෙම තත්ත්වය තවත් වර්ධනයවීමේ පවතින බැවින් කළු ගඟ දෙපස ජනතාව දැඩි සැලකිල්ලකින් පසුවන ලෙසටයි වාරිමාර්ග දෙපාර්තමේන්තුව ඉල්ලා සිටින්නේ.
මේ අතර ඊයේ (16) පස්වරුවේ සිට ඇඳ හැලෙන අධික වර්ෂාවත් සමග දිස්ත්‍රික්ක 04ක ප්‍රාදේශීය ලේකම් කොට්ඨාස 14කට නායයෑම් පිළිබඳ අනතුරු ඇගවීම් නිකුත් කර තිබෙනවා.
ජාතික ගොඩනැගිලි සංවිධානය සදහන් කළේ, ගාල්ල දිස්ත්‍රික්කයේ නෙළුව, යක්කලමුල්ල, නාගොඩ සහ ඇල්පිටිය ප්‍රාෙද්ශීය ලේකම් කොට්ඨාසවලටත් කළුතර දිස්ත්‍රික්කයේ හොරණ, බුලත්සිංහල, මතුගම සහ ඉංගිරිය යන ප්‍රාදේශීය ලේකම් කොට්ඨාසවලට නායයෑම පිළිබඳ අනතුරු ඇගවීම් නිවේදන නිකුත් කර ඇති බවටයි.
මාතර දිස්ත්‍රික්කයේ පිටබැද්දර ප්‍රාදේශීය ලේකම් කොට්ඨාසයටත් රත්නපුර දිස්ත්‍රික්කයේ රත්නපුර, ඇලපාත, කලවාන ඇහැළියගොඩ සහ කුරුවිට යන ප්‍රාදේශීය ලේකම් කොට්ඨාස සඳහා නායයෑම් පිළිබඳ අනතුරු ඇගවීම් නිවේදන නිකුත් කර ඇති බවයි ජාතික ගොඩනැගිලි පර්යේෂණ සංවිධානය සඳහන් කළේ.
මේ අතර, කෑගල්ල දිස්ත්‍රික්කයේ වරකාපොල, යටින්තොට, කෑගල්ල, දැරණියගල සහ දෙහිඕවිට යන ප්‍රාදේශීය ලේකම් කොට්ඨාස සඳහා නායයෑම් පිළිබඳ විමසිලිමත්වීමේ නිවේදන නිකුත් කර තිබෙනවා.
