උතුරු මුහුදේ නීතිවිරෝධී ලෙස ධීවර කටයුතුවල නිරතව සිටි ඉන්දීය ධීවර යාත්‍රාවක් නාවික හමුදා යාත්‍රාවක ගැටී සිදුවූ අනතුරින් එරට ධීවරයෙකු මිය යෑමේ සිද්ධියට විරෝධය පළ කරමින් ඉන්දියාවේ රාමේෂ්වරන් ධීවරයින් පිරිසක් වර්ජනයකට යාමට සූදානම් වනවා.
මේ අනුව ඔවුන් නැවත දැනුම් දෙනතුරු ධීවර කටයුතුවලින් ඉවත්වීමටයි තීරණය කර ඇත්තේ.
ඉන්දීය ධීවරයින් පිරිසක් යාපනය ඩෙල්ෆ් මුහුදු සීමාවේ අනවසරයෙන් ධීවර කටයුතුවල නිරත වන බවට ලද තොරතුරකට අනුව ඔවුන් අත්අඩංගුවට ගැනීම සඳහා නාවික හමුදාව ඊයේ මෙහෙයුමක් දියත්කර තිබුණා.
කෙසේ වෙතත් නාවික හමුදා යාත්‍රාව අදාළ ධීවර යාත්‍රාව ආසන්නයට ලඟා වූ අවස්ථාවේ එම යාත්‍රාව පලා යාමටයි උත්සහ කර තිබූණේ.
එහිදී ඉන්දීය ධීවර යාත්‍රාව සහ නාවික හමුදා යාත්‍රාව එකිනෙක ගැටීම හේතුවෙන් ඉන්දීය ධීවරයින්ගෙන් එක් අයෙකු මියගිය අතර, තවත් දෙදෙනෙකු තුවාල ලබා රෝහල් ගත කෙරුණා.
තවත් අයෙකු මුහුදට වැටී අතුරුදන් වී තිබෙනවා.
අදාළ සිද්ධිය සම්බන්ධයෙන් ඉන්දීය රජයද, ශ්‍රී ලංකා රජය වෙත සිය විරෝධය පළ කර තිබෙනවා.
මේ අතර පවතින දේශපාලන තත්වය මත ඉන්දීය අග්‍රාමාත්‍ය නරේන්ද්‍ර මෝදිගේ ශ්‍රී ලංකා නිල සංචාරය අවලංගු කර ඇති බව ඉන්දීය මාධ්‍ය වාර්තා කළා.
ඉන්දීය අග්‍රාමාත්‍යවරයාගේ ශ්‍රී ලංකා සංචාරය මේ මස පැවැත්වීමට නියමිතව තිබුණා.
