රාජගිරිය, බුත්ගමුව මාර්ගයට යාබද ජල රක්ෂිත භූමියෙන් කොටසක් නාගරික උද්‍යානයක් ලෙස සංවර්ධනය කිරීමේ යෝජනාවට අමාත්‍ය මණ්ඩල අනුමැතිය හිමිව තිබෙනවා.
කොළඹ, ශ්‍රී ජයවර්ධනපුර කෝට්ටේ, කොළොන්නාව සහ කඩුවෙල ප්‍රාදේශීය ලේකම් කොට්ඨාශයේ පිහිටි වගුරු බිම් මහ කොළඹ ගංවතුර පාලන හා පරිසර වැඩිදියුණු කිරීමේ ව්‍යාපෘතිය යටතේ ජල රක්ෂිත ස්ථාන ලෙස පවත්වාගෙන යාම සඳහා ශ්‍රී ලංකා ඉඩම් සංවර්ධන සංස්ථාව විසින් රජයට පවරාගෙන ඇත.
කෙසේ වෙතත්, රාජගිරිය, බුත්ගමුව මාර්ගයට යාබදව අත්පත් කරගෙන ඇති ජල රක්ෂිත ඉඩම් අනවසර ඉදිකිරීම් සහ වෙනත් කටයුතු සඳහා භාවිත කිරීමට ඇතැම් පාර්ශව උත්සාහ කරමින් සිටින බව රජය පවසනවා.
එබැවින් එම ඉඩම් ආරක්ෂා කර ගනිමින් ශ්‍රී ලංකා ඉඩම් සංවර්ධන සංස්ථාවේ මඟපෙන්වීම යටතේ මෙම ඉඩම් සුදුසු සංවර්ධන කටයුතු සඳහා යොදා ගැනීමට තීරණය කර ඇත.
ඒ අනුව පෞද්ගලික අංශයේ දායකත්වය ලබා ගනිමින් හඳුනාගත් ඉඩමක් නාගරික උද්‍යානයක් ලෙස සංවර්ධනය කිරීමට යෝජනා කැඳවීමට නාගරික සංවර්ධන හා නිවාස අමාත්‍යවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව තිබේ.
