කොම්පඤ්ඤ වීදිය සහ ජස්ටිස් අක්බර් මාවත යා කෙරෙන ගුවන් පාලම ජනාධිපති රනිල් වික්‍රමසිංහ මහතා අතින් මීට සුළු මොහොතකට පෙර විවෘත කළ බව ජනාධිපති මාධ්‍ය අංශය (PMD) පවසයි.
මෙම ව්‍යාපෘතියේ ඉතිරි ඉදිකිරීම් සැප්තැම්බර් මාසය වන විට අවසන් කිරීමට සැලසුම් කර ඇති අතර, සම්පූර්ණ ව්‍යාපෘතිය සඳහා ඇස්තමේන්තුගත මුදල රු. 5,278,081,272.43, ජනාධිපති මාධ්‍ය අංශය වාර්තා කළේය.
රජයේ කාර්යාල, රෝහල්, ආගමික ස්ථාන, ආපනශාලා, සිනමා ශාලා ඇතුළු විවිධ ආයතනවලින් සමන්විත ඉතා කාර්යබහුල වාණිජ නගරයක් වන කොම්පඤ්ඤ වීදිය ප්‍රදේශයේ පිහිටි දුම්රිය හරස් මාර්ගය හේතුවෙන් ඇති වන වාහන තදබදය ආදී කරුණු හේතුවෙන් දිනකට පැය 3කට ආසන්න කාලයක් අපතේ යන බව නිරීක්ෂණය වී තිබේ.
ප්‍රමාදය මඟහරවා ගැනීම සඳහා මාර්ග සංවර්ධන අධිකාරිය මගින් ක්‍රියාත්මක වන මෙම ව්‍යාපෘතියේ ඉදිකිරීම් කටයුතු Maga Engineering සමාගම විසින් සිදු කරන බව ජනාධිපති මාධ්‍ය අංශය නිවේදනයක් නිකුත් කරමින් සඳහන් කරයි.
