පොලිස් කොස්තාපල්වරයෙක් තවත් කොස්තාපල්වරයෙක්ට වෙඩි තැබීමට තැත් කිරීමේ සිද්ධියක් කහතුඩුවෙන් වාර්තා වෙනවා.
ඊයේ අළුයම කහතුඩුව පොලිස් ස්ථානයේ සේවා මුරයේ නියුතු වූ නිළධාරීන් දෙදෙනෙක් අතර මෙම ගැටුම ඇති වී තිබෙනවා.
ගැටුමට අදාළ වූ හේතුව සඳහන් වූයේ මෙලෙසයි.
ඊයේ අළුයම 5.40ට පමණ පැමිණිල්ලක් කිරීමට දෙදෙනෙක් පැමිණි විට උපසේවක ලෙස රාජකාරියේ යෙදී සිටි නිළධාරියා එම පුටුවේ නිදාගෙන සිට තිබෙනවා. එහිදී ඔහු අවදි කිරීමට දුරකථන ක්‍රියාකරු ලෙස සිටි නිළධාරියා කිහිප වරක් උත්සාහ කළද අවදි වී නැති අතර ඔහු අවදි කිරීමට අනෙක් නිළධාරියා ඔහුගේ හිසට පහරක් දී හිසට වතුර වත් කර තිබෙනවා.
පසුව වෙනත් නිළධාරියෙක් විසින් පැමිණිල්ල සටහන් කිරීමෙන් පසු අදාළ පෙර කී සිදුවීම පිළිබඳවද පොලිස් පොතේ සටහනක් තබා තිබෙනවා. පසුව ඒ පිළිබඳව නිදා සිටි නිළධාරියා සහ දුරකථන ක්‍රියාකරු සිටි නිළධාරියා අතර බහින් බස් වීමක් ඇති වී තිබෙනවා.
ඉන් පසු දුරකථන සේවයේ සිටි නිළධාරියා භට නිවාසය වෙත පිටත් වී ගිය විට සැකකාර නිදා සිටි නිළධාරියා රාත්‍රී ජංගම සේවයේ නිරත වූ නිළධාරියෙකු භාර දී තිබූ පිස්තෝලයක් අවි පෙට්ටියට නොදමා රැගෙන භට නිවාසය වෙත ගොස් යළිත් දුරකථන සේවයේ සිටි නිළධාරියා සමඟ බහින් බස් වීමක් ඇති වී තිබෙනවා. මෙහිදී සැකකාර නිළධාරියා දුරකථන සේවයේ සිටි නිළධාරියාට වෙඩි තැබීමට උත්සාහ කර ඇති අතර එහි සිටි වෙනත් නිළධාරීන් දෙදෙනෙක් ඔහු අල්ලාගෙන පිස්තෝලය උදුරාගෙන තිබෙනවා.
ඉන් අනතුරුව සැකකාර නිළධාරියා අත් අඩංගුවට ගේ ඇති අතර ඔහු කැස්බෑව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
