විදුලිබල මණ්ඩලය ප්‍රතිව්‍යුහගත කිරීම සඳහා ඉදිරිපත් කර ඇති ශ්‍රී ලංකා විදුලිබල පනත් කෙටුම්පත වැඩි ඡන්ද 44කින් සම්මත වුණා. අදාළ ඡන්ද විමසුම අද (06) පාර්ලිමේන්තුවේදී පැවැත්වුණා.
එහිදී ඊට පක්ෂව ඡන්ද 103ක් ලැබුණු අතර විපක්ෂව ලැබුණේ ඡන්ද 59ක් පමණි.
විදුලිබල කර්මාන්තයට සිදුකරනු ලබන ප්‍රතිසංස්කරණ ක්‍රියාත්මක කිරීමට විධිවිධාන සැලැස්වීම සඳහා මෙන්ම ජාතික විදුලිබල උපදේශක සභාව පිහිටුවීමට විධිවිධාන සැලැස්වීම, විදුලිබල උත්පාදනය , සම්ප්‍රේෂණය, බෙදා හැරීම, වෙළඳාම් කිරීම, සැපයීම සහ ප්‍රසම්පාදනය සමාගම් පනත යටතේ සංස්ථාගත කිරීම මෙම විදුලිබල පනත් කෙටුම්පත මගින් යෝජිතයි.
මේ අතර විදුලිබල සේවකයින් ඇතුළු පාර්ශ්ව රැසක් ඊට විරෝධය පළ කළා.
අදාළ පනත් කෙටුම්පත සම්බන්ධයෙන් ශ්‍රේෂඨාධිකරණය හමුවේ ගොනුකළ පෙත්සම් විභාගයෙන් අනතුරුව තීන්දු කර ඇත්තේ නිර්දේශිත සංශෝධනවලින් තොරව එය සම්මත කළ නොහැකි බවත් ඒ සඳහා පාර්ලිමේන්තුවේ විශේෂ බහුතරය මෙන්ම ජනමත විචාරණයක්ද අවශ්‍ය බවද එම තීරණයේ දැක්වුණා.
